س/ ايه هي صلاة التراويح و ليه اتسمت تراويح؟
ج/صلاة التروايح هي صلاة القيام اللي بنصليها بعد العشاء مباشرة في رمضان
واتسمت تروايح من الاستراحة ...لأنهم كانوا بيستريحوا بين كل ركعتين أو كل أربع ركعات ..فسموها تروايح من الاستراحة
****
س/ طيب إيه أجر صلاة التراويح؟
ج/ مغفرة الذنوب والفوز برمضان
لحديث : "مَنْ قَامَ رَمَضَانَ إِيمَانًا وَاحْتِسَابًا غُفِرَ لَهُ مَا تَقَدَّمَ مِنْ ذَنْبِهِ"
غير إنك بتختار اسمك في السماء على قدر صلاتك للتروايح
في الحديث:
"مَن قامَ بعشرِ آياتٍ لم يُكتَبْ منَ الغافلينَ، ومن قامَ بمائةِ آيةٍ كُتِبَ منَ القانتينَ، ومن قرأ بألفِ آيةٍ كُتِبَ منَ المقنطِرينَ"
****
س/ وقت صلاة التروايح بيبدأ امتى ويخلص إمتى؟
ج/ بتبدأ التروايح بعد صلاة العشاء ع طول وتقدر تصلي طول الليل عادي لحد الفجر بس صلاتك آخر الليل اسمها تهجد
****
س/ طب هيا التراويح كام ركعه؟!
ج/ السنة 11 ركعة وممكن تزود أو تقلل، المهم تكون عدد زوجي 8 مثلا وبعدها ركعتين شفع وركعة وتر
بس خد بالك لو ناوى تصلي بالليل تهجد يبقي سيب ركعه الوتر تصليها اخر حاجه خالص
*
س/ بنصلي التراويح ازاي ؟!
ج/ ركعتين ركعتين .. بعد كل ركعتين تسلم
*
س/ لازم نصلي التروايح جماعة ؟
ج/لا مش لازم جماعة
ممكن تصليها لوحدك بس احنا في رمضان ماتحرمش نفسك من متعة التروايح
****
س/طيب ينفع أصلي جماعة مع الأمام أربع ركعات وأوتر في البيت ؟
ج/ لو عملت كده هتضيع على نفسك أجر انك يتكتب لك أجر قيام الليلة كاملة والأجر ده بياخده اللي يصلي التروايح مع الإمام لحد ماالإمام يخلص
لحديث:( مَنْ قَامَ مَعَ الْإِمَامِ حَتَّى يَنْصَرِفَ كُتِبَ لَهُ قِيَامُ لَيْلَةٍ)
****
س/ طب ينفع نقرأ فيها من المصحف ؟!
ج/ اه ينفع نقرأ من المصحف فيها حتى لو هتمسك المصحف في ايدك ينفع برضو
****
س/ طب لو مش هقدر أصلي 11 ركعة ؟!
ج/ صلي قدر استطاعك ، بس ماتنساش اننا في رمضان والأجر كبير فماتحرمش نفسك
****